Stat
2
Wulapm Weink nkamp nimpiliekn apul omouleel. Et kil awop wolpm ankilel apul war munkuniemp omouleel kipmin nako kil pirpmel Wulapm Weink mper omoule kile apmoi niokn kumpueik kil apulel. Niokn kilelel ka ar Iden, ar yemp yakitie ka awun noel. Wulapm Weink apul kitapm ka lo mimi eik nukur nukurel. Nti ka aser lo irpm ka akosepm, wurkopm antuol ka akosepm niunkun na yelel. Lo wie ka itnei ar niokn nimuonel kilelel. El ko yupul nti omoule na yer sepmel yopmoiel. Et el kako yupul yapmonemp antuol na yitityokor yupulp weink yapmonemp eikusuknel, ka sepm mi koret.
15-17 Wulapm Weink apul kitapm sukurel niatel, kil ukua omoulel karep kil apulel la, mper kil apmoi niokn Iden nako kil wakerp niokn kilelel. Kil mper kil ar niatel, Wulapm Weink nakimpil na, “Lowurkopm eikusukn ka tnei niokn keielel ko yikn yel. Et lowurkopm lekekn keielel ka ok omoule yapmonemp sepmel nako kil ser yoworel sinsi mimi ka sepmelel, sinsi mimi ka kuoretelel, lowurkopm kile et yikn korokn yel. Et yikn kona yelel, yikn kako pelkel yuwur.”
18-20 Ar lala, Wulapm Weink napmok na, “Omoule kilelel sit ar, aser karokn sepm. Et apm'a yupul setelel yatel ninink ko ikiwatilel?” Et kakilpe Wulapm Weink nkamp kitapm ampul wus aipm irpm mitinkel. Niatel kil ukua nti la ntinkiremp omoule kile, nako kil wul nti nio lekekn lekeknel. Ka omoule kile apul nsop, kil wul nti wus wampiliekn antempel wus yankerel nio, antempel aipm suknako eikusukn. Nio eikusuknel kilelel, kipe ar opmueiklekekn, ka nio antuol. Aser karokn ninkemp lekekn antuol nako ikiwat Adamel ntoka loale ankilel.
21-25 Kakilpe Wulapm Weink naimpil apul omoule kile ka ar niumpu wuntuimp. Kil ar niumpu aser, Wulapm Weink amiye lenkepm apmoi kil worienk naimpil muor kil entieaikn karep kil aiye lenkepmel. Epe Wulapm Weink akei lenkepm karep kil aiye ar ementitel akei ampul muakenel, ar, nako kil yitnimp muakenel milap ementit. Kona omoule kile na ser muakenel, kil napmok na, “Kakilpe. Kil ka loale apmelel. Lenkepm ankilel ka eik lenkepm apmelel naikul. Aser wusmpo ankilel ka eik wusmpo apmelel naikul. Ka Wulapm Weink akei lenkepm apmelel apul kil, et kakilpe apm kako miyimpil muaken.” Et kakilpe, an kipe apul soplekekn. Ementit ka nisep waiekmantiek ankilel nako nkis amintemp muaken ankilel, ntiwie ka ar nkis mila lekekn. Ntiwie ka akei ntayelel ar nkis. Aser ka ntiwie karokn naimpil wulemaiyakel.