I SAMUEL
16
Epe Wulapm Weink nakimp Samuel nak na, “Aninkel yikn ka saiyip Solel ka ar mpeikn mpeikn. Et yikn nker yapmonemp wankepmel aiyiknel kilelel wat. Sol ka miniat, karep apm nkimer kil. Kil ka korokn nimpil yupul niokn omoule amamp Israelel yer niampepm apmelel. Karokn. Et yikn ko semp wulienk ka no amamp wus sipsipel, yekei mpep wel Olivel yo eikipmin, nako yikn yupul yumu Betlehem. Yikn yuwup Jesi apulp apm ka yuwak ninkilapm ntit lekekn ankilel na ko semp yemp omoule amampel.” Nti karep la etn niampepm Wulapm Weinkel, ka kilpe Samuel aser Eliap, ka ninkilapm wotomp Jesiel. Epe kil wonempwaiyimp nak na, “Ank tikikn, kil ankil ka omoule Wulapm Weink yuwakel na semp yemp omoule amampel.” Et Wulapm Weink nakimpil nak na, “Kil karokn. Yikn korokn wonempwaiyimp nek na kil ka aipm leiyenkip, akaik onto mpeiknelip nako apm yuwak kilel. Ka apulp niampepm apmelel karokn nuarep niampepm aiyipmel omoule kitapmelel nako apm ser soplekekn yupulp omouleel, ka kil akosepm mi kuoret mi. Karokn. Yipm omoule ka aser wuleyun eikrieknel. Aser apm ka aser apei kipmin, yapmonemp nilmpniumpuaipm omouleel. Et ntokilelel apm nak na kil ka akosepm mi kuoret mi.” 10 Ka kilpe Jesi apul nti ninkilapm ntit wiewieel ankilel, kil apul nti la apmon niampepm Samuelel. 11 Epe Samuel nakimp Jesi nak na, “Wulapm Weink karokn yuwak omoule lekekn antuol.” Kil aiyimp Jesi na, “Et ninkilapm ntit aiyiknel ka keielel epe, a?” Aser Jesi nak na, “Arokn. Ka ninkilapm muntomp apmelel uknuan antuol kurpe wakerp wus sipsip ar la kuor.” Ka kilpe Samuel nakimpil na, “Et yikn niuwuwul ninkilapmel sempil yupul la, nako an mper oumpyepmel.” 12 Ka kilpe Jesi niuwuwul omouleel la nkamumpil apul kil mila. Ninkilapm Jesiel kilelel, mponiampepm ankilel ka akosepm ntinkirai, ka aipmleiyenkip. Wule ankilel ka sumsumpelip. Et Wulapm Weink nakimp Samuel nak na, “Ka kil kilelel epe. Yikn semp mpep wel apulp na yuwak omoule amampel nimpirp yo kil amamp.” 13 Ka kilpe Samuel nkamp mpep wel olivel ka kil apul lael, epe kil nimpirp mpep wel pitekn amu amamp Devitel ar niampepm antuol mamuntomp ankilel. Et awun keielel Pirpm Wulapm Weinkel ka ar mintenkel awulmp Devit, ka antempil ar suknel ar yapmonemp nilmpniumpuaipm ankilel ar aninkaninkel. Niatel, Samuel naimpil mila oumpyetne weink ankilel Rama.