Mark
Riwana Ahiahina Mark i girugirumiya
Pariverena
Wei bukana, yamna giruma etaetana Yesu ana bagibagi ma ana viharaharamana tuyaeghana. Aiyai da wei bukana i girumi yamna egha wavana itavi hegheta. Numa taparoro babadahi waduwadubohi he notanotai da Mark i girumi. Mark egha tauna tauvotahotagho; wate tauharaharamana maghamaghauhi he notamotai da Peter maiteni au Rome hi ma'ae. Ma Peter, Yesu ana kauwa ma ana viharaharamana anatapuna Mark i riwana pahiyei. Anina ma Mark wei raurautuwahi i girumi da tauvi tumaghana anatapuhi au Rome hita haramanei Yesu i yai aiwai i kauwei. Riwa etaetana evivi hegheta da wei yamna Tuyegha Ahiahina Yesu Keriso God Natuna aubaina. Wei bukana au horana ta inainai Yesu auwarina riwapana e ma'ama'ae da kauwa maghamaghauhi ina kauwei. Tana inanai marainana rava evivi haraharamanihi, aruwa-apoapoehi evivi yaghaghana hopunehi ma rava doridoriahi evivi yawahanihi ma ghoha apoapoe ravahi ahi e notanota-tawanei. Mark, Yesu ana kauwa maghamaghauhi i girumi ma ana viharaharamana egha ghaeghaenana ita riweta. Mark ivi hegheta menana'arena Yesu i hiraghenei au korosi da rava ita gagayowehi ma menana'arena God, Yesu i taravainaghaiyei au mara.
1
John Taubabataito, Yesu ana aninae ivo kaukauwei
(Mat 3:1-12; Luk 3:1-18; Jhn 1:19-28)
We'i yamna God natuna Yesu Keriso Tuyeghana Ahiahina me ivi karenanei.
Warihagha peroveta Aisaiya, wenana'arena God ponana i girumi:
“Ona rau-tanighana! Taupariverena ana aipari-tawane'i
da am etanai inavo kaukauwei.” (Mal 3:1)
“Taupariverena au mutuyuwa evivi ghoreghore,
‘Taumi ana aninae ona vokaukauwei,
ana eta ona vovai-didimani.’ ” (Isa 40:3)
Anina ma taupariverena John i ne'i au mutuyuwa da rava i bababataitohi ma God riwana i dimedimei ipa, “Ghoha'apoapoe kauwana ona voterei ma ona wanavira-meyemi God awarina. Maranai ana babataitomi, yamna inavi matakiraha da taumi, God ami ghoha'apo'apoe ina nota-tawane'i.” Ma rava anatapuhi, Judiya au paratana ma mai Jerusalem hi nae da John hita rau-tanighanei. Na'i marana ahi apoapoe hivi heghai ma tauna, Jordan wairana au horana i babataitohi.
Ma John, ghamoghamo ana wava kamel aparana metametanana i oteoteni ma ana tairoro ghamoghamo opina. Tauna ana yam kapa'u ma tawaya. Ma tauna, rava i ririwehi ipa, “Muriyai rava ghehauna e nene'i, tauna i ghe vavahagha, egha me tau. Tau egha tagotagogiu da ana aehuma ghuravana ata rupeni. Tau wairei a bababataitomi ma tauna, Aruwa Vivivireinei ina babataitomi.”
John, Yesu i babataitoi
(Mat 3:13-17; Luk 3:21-22)
Na'i maranaina Yesu Nasaretei, Galili ana au parata i voterei ma i gha'ira, mepa John i bababataito-yana. Ma John au waira Jordan, Yesu i babataitoi. 10 Ma maranaina Yesu wairei i ghe'eghe'eta, i inana da mara i wana-tawane'i* Isa 64:1 ma Aruwa Vivivireina me gabubu i gha'ira'i ma horana ivi howai. 11 Ma God ponana marei i hopui ma i riwa ipa, “Tam, tau natu'u au nuwavaina ma uvi nuwa-ahiahiniu.”
Satan, Yesu i raudadani
(Mat 4:1-11; Luk 4:1-13)
12 Ma yamna au murina God Aruwana Vivivireina, Yesu i pari-tawanana hopune'i au mutuyuwa. 13 Ma maratom 40 Yesu au mutuyuwa i ma'ae ma Satan, tauna i rau-dadani. Tauna, ghamoghamo moduwei maitehi nai au dobuna hi ma'ae ma God ana aneya marei, tauna hi pa'ini.
Yesu, oroto yebayebaghahi 4 i ghorehi
(Mat 4:12-22)
14 Ma Guyau Herod, John i pani da deri au numana i terei. Mrk 6:14-29 Ma au murina Yesu i nae au Galili ma rava auwarihi, God Riwana Ahiahina i dimei. 15 Ma Yesu i ririwa ipa, “God ana mara i ririweiya i ghe'etai. God ana vibadana vouna, rava aubaihi yamna i turiyai. Ami ghoha'apoapoena ona rupeni ma riwana ahi'ahina onavi tumaghanei.”
16 Ma mara tagogi maranaina Galili topana au gerahana i bababara nae; ma tauyebagha ruwagha i inanahi. Simon ma ana tevera Andrew, ahi hagida hita yetayei au boga. 17 Yesu i riwehi ipa, “Ona nei ma ona votaghou. Ma me marina o yebayebagha; nana'arena anavi haraharamanimi da rava ona tuaruhi da hinavi tumaghaneu!” 18 Ma maratagogi ahi hagida hi voterei ma Yesu hivo taghotaghoi. 19 Ma tauhi gerahei hi veraunae ma Yesu, Zebedi natunatuna i inanahi James ma John ahi auwaga; ahi hagida wanawana-rorona hi yaruyarumi. 20 Ma maratagogi tauhi i ghorehi ipa, “Taumi ona ne'i ma ta'u ona votaghou!” Ma tauhi, amahi Zebedi ana taunoya maitehi hivo terehi ma Yesu hivo taghotaghoi.
Yesu, aruwa-apoapoena oroto au horana i viyaghaghana hopunei
(Luke 4:31-37)
21 Yesu, ana tauvotaghotagho maitehi hi nae au Kapernaum. Ma Sabate au marana i ruipari au numana ma God Tuyeghana Ahiahina, viharaharamanana ivi kareni. 22 Ma taurautanighana, tauna ana viharaharamana hi bahei; aubaina tauna ana riwapane'i ivi haraharamana, egha me Raugagayo Tauviharaharamanahi. Warihagha, God Moses raugagayo, i verei da mai Isra'el hita vote'ete'ei.
23 Maranai Yesu, pari au numana ivivi haraharamana ma oroto aruwa-apoapoena horana i ruiruiniya i garara 24 ipa, “Yesu Nasaretei! Am ghohana awari'ai aiwa'i? Tam weka u ne'i da ma rau-ivi'apoapoye'ai bo? Tau, a haramanei tam aiya'i; tam, tagogi vivivireim Godei!”
25 Ma Yesu i rau-gamopotai, “Ma genuwana! Na orotona ma hopu-tawane'i.”
26 Aruwa-apoapoena, orotona ivo vaitatatavi ma ana gararana i hopu tawanei. 27 Ma rava anatapuhi hi bahei ma tauhi hivi tarapirivivira, “Aiwa'i kauwana e tuputupuwa? We'i vihegha vouna, ravana ana rewapana e ma'ama'ae. Yamna aubaina aruwa-apoapoehi e ririwehi ma hevivi ponavowei!”
28 Yesu ana vighegha vouna tuyeghana, maratagogi Galili dobuna i howai.
Yesu, rava maghamaghauhi i viyawahanihi
(Mat 8:14-17; Luk 4:38-41)
29 Ma pari au numana hivo tere'i. Yesu ana tauvotaghotagho maitehi hi nae Simon ma Andrew ahi au numa; James ma John maitehi hi nae. 30 Simon pohiyana wavinena ana gaugaururuna ana au anieno i enoeno. Maranaina Yesu i ne'i; numana ravahi, doria tuyeghana hi pari-verei. 31 Tauna i nae wavine i enoeno yana; ma nimana i vaini, ivo hagu'i da ivo mahiri. Maratagogi gaugaururu i voterei ma wavinena, tauhi i inana vaitetehi.
32 Madegha i harere ma raviraviyai, tauhi ahi rava doridoriahi ma tauhi aruwa-apoapoena i ruiruinihi, hi neiyahi ma'i Yesu awarina.§ Madegha i harere, anona yamna Sabate marana i kwaha. Mai Jew ahi viyawahi marana au Friday au madegha harere, evivi kare da au Saturday au madegha harere, e kwahakwaha. 33 Meyagai ghaeghaena ravahi anatapuhi, numana au naona hivi tagogiyehi. 34 Rava maghamaghauhi ahi doria tapuna da tapuna ivi yawahanihi ma aruwa-apoapoehi rava i ruiruinihi ivi hopunihi. Ma aruwa-apoapoehi hi haramane'i da tauna aiya'i. Yamna aubaina i rau-gamopotahi.** Yesu i haramane'i da ina pa, aruwa-apoapoehi, inavi aninehi da tauhi hinavi hegha da tauna anina Keriso, apo rava, tauna, hita hegari da itavi tauvighaviya badana. Tauhi hi hi haramane'i da Keriso ana noya yamna. Jhn 6.15
Yesu au Galili i rau-guguya
(Luk 4:42-44)
35 Au maratomtom, Yesu enowei ivo mahiri; numa i hoputawane'i ma i nae gabu au rauraugovaghana. Ma kampa, God maiteni hi dedede. 36 Ma muriai, Simon varevarehina maitehi hi nae da hi baihei. 37 Ma maranai Yesu hi tuhaghai; hi riwei hipa, “Rava anatapuhi he baibaihem.”
38 Yesu i pari-beyehi ipa, “Tana nae meyagai ghehauhi au ghereghere. Ma kampa, God Tuyeghana Ahiahina ana rau-guguyei. Ta'u yamna aubaina a ne'i.”
39 Ma Galili meyagaihi anatapuna i naenihi ma pari au numahi, God tuyeghana i rau-guguyehi ma aruwa-apoapoehi rava au horahi ivi hopunihi.
Yesu, oroto ivi yawahani
(Mat 8:1-4; Luk 5:12-16)
40 Maratagogi oroto opina pagapagana i nae Yesu awarina, au naona i pe'u, i rau-duneyei ma hagu ivi baghei ipa, “Inapa am ghohaghohana; yamna mavi ahiahiniu.†† Jew ahi raugagayo e ririwa da aiya'i opina kamakamana ghaeghaehi bo opina i wana gwadagwadai yana tauna yana ana hini gobuna. Tauna egha au meyagai ina ma'ae rava maitehi. Mai Jew egha hitavi aninehi we'i ravahi hina vodadanihi. Rava hini gobuhi yana egha hinavi taparoro gogona, rava ghehauhi maitehi. Mepa da rava ana hini gobuna i yawahana, yana tauna i ahi da tagotagogina ina nememe'i meyagai ma rava auwarihi ina ma'ae.
41 Yesu, orotona ivi nuwaboyei da urana ivi yoyoi ma ivo dadani ma i riwei ipa, “A ghohei. Ma ahi!” 42 Ma maratagogi, paga doriana orotona i voterei ma tauna i yawahana. 43 Yesu ivi gha'ana guratei ma i pari-tawane'i, 44 “Tam, aiwa'i i tuputupuwa awarim; rava egha mavi heghehi! Didimanim ma nae da metauna pirisina. God, rava ahi puyo e am'amverenei, tauna awarina mavi atataiyana meyem! Ma Moses yawahana puyona i ririweiya, ma ghohai da yamna inavi heghehi da tam u ahi.‡‡ Pirisi bo puyo tau am verenana God awarina da rava hina haramanei da tauna ana doria i hamo'a.
45 Ma orotona i nae da ana viyawahana tuyeghana, meyagai ravahi anataputapuhi i pari-verenaiyehi. Yamna aubaina, Yesu egha au meyagaihi ita rui ma i nae da au mutuyuwa i ma'ama'ae. Wate meyagai ravahi hi naenae awarina.

*1:10: Isa 64:1

1:14: Mrk 6:14-29

1:22: Warihagha, God Moses raugagayo, i verei da mai Isra'el hita vote'ete'ei.

§1:32: Madegha i harere, anona yamna Sabate marana i kwaha. Mai Jew ahi viyawahi marana au Friday au madegha harere, evivi kare da au Saturday au madegha harere, e kwahakwaha.

**1:34: Yesu i haramane'i da ina pa, aruwa-apoapoehi, inavi aninehi da tauhi hinavi hegha da tauna anina Keriso, apo rava, tauna, hita hegari da itavi tauvighaviya badana. Tauhi hi hi haramane'i da Keriso ana noya yamna. Jhn 6.15

††1:40: Jew ahi raugagayo e ririwa da aiya'i opina kamakamana ghaeghaehi bo opina i wana gwadagwadai yana tauna yana ana hini gobuna. Tauna egha au meyagai ina ma'ae rava maitehi. Mai Jew egha hitavi aninehi we'i ravahi hina vodadanihi. Rava hini gobuhi yana egha hinavi taparoro gogona, rava ghehauhi maitehi. Mepa da rava ana hini gobuna i yawahana, yana tauna i ahi da tagotagogina ina nememe'i meyagai ma rava auwarihi ina ma'ae.

‡‡1:44: Pirisi bo puyo tau am verenana God awarina da rava hina haramanei da tauna ana doria i hamo'a.