Mak
Yesu bai i voivoiyena a kuli wata.
Yesu ena noya bi ena wailovelove niga bukanemo a gei gilumi. Niga bukana taugilumina mote aiyai i sibe kauwe. Bi lava nuwanuwa uyeuyedi sa giugiu te Mak i gilumi. Mak tana mote Yesu ena tauwaikaiwatana12 nopodimo. Bi lava ḡesaudi a noḡoti te Pita vaitena Loummo a miyamiya bi Pita i giugiu bi i vaivaiyena luvanemo i gilumi. Tana mote bai matabuna i gilumi bi Yesu baibaiḡa i voivoiyedina taudidi i gilimidi.
Mak ena giu noponemo giu dabana dolidolina ba ‘Wasa visuvisuna.’ Tana ena buka noponemo Yesu ena wailovelove mote i gilumidi bi bai i nawa bi i voivoiyedina taudidi i gilumidi. Mai aluwa gebogebodi lava lisidimo i kwavidi, lava sidesidedi i waiyawasanidi bi edi gebogebo i noḡoti kamaḡedi. Yesu bainewa kolosimo i peki bi ena kena moito taunana Mak i wailoveda.
1
Diyoni taukabulu Yesu ena eta i yawasi
(Metiu 3:1-12; Luk 3:1-18; Diyoni 1:19-28)
Maimaituwa natuna Yesu Vinevinena, giuna visuvisuna i tubuḡana ba niga mainana,
Taugiuwatana Aisaiya i kulikulina mainana i tubuḡa. Maimaituwa i giuna gado,
 
“Kwai beyavaiya! Tagu egu tauwainoyanoya yea gei giukamaḡe bi tam em eta ya yawasi. Mal 3:1
Lava ḡemota kalakalalelemo ya binabinau. Tana niga mainana ya binabinau:
Bada ena eta koka visuvisu bi koka didimani bi tana ya natonato.” Aisaiya 40:3
Taunana aubaina Diyoni taukabulu, kalakalalelemo i tava bi lava i kakabuludi. Tana i lauguguyana gado, “Emi gebogebo ko gosedi bi ko nato yea kabulumi bi Maimaituwa emi gebogebo ya noḡoti kamaḡedi.” Lava wapewapedi Diudiyamo bi Yelusalemmo miyemiyedi a nawa Diyoni lisinemo. Bi edi gebogebo a kuvesidi bi Diyoni Diyoudan gaubinemo i kabuludi.
Diyoni ena kotekote ba kamelo kapalina vatuvatulina i kotekote bi ena tagilolo ḡamoḡamo kwapina. Bi kanaya ba kapau bi iwavi. Bi tana lava i giugiuwedina gado, “Lava muliguḡa ya natonatona ba laukai otina mote mai tagu. Tagu mote ḡemoḡemotigu te ya laudulu bi ena kaḡesuma yea kaikamaḡe. Tagu gaubemo yea kakabulumi bi tana lavana muliḡa ya natonatona tana Aluwa Waiyawemo ya kabulumi.”
Diyoni Yesu I Kabulu
(Metiu 3:13-17; Luk 3:21-22)
Mba laḡannemo Yesu Galilimo Nasalet i gose bi i nawa Diyoni lisinemo. Bi Diyoni Diyoudan gaubinemo Yesu i kabulu. 10 Yesu gaubemo i lovolovo tava bi galewa nuwawasena i kita. Bi Aluwa i yovona lisinemo kitana mai gabubu. 11 Bi Maimaituwa kalinana galewaḡa i yovona gado, “Tam ba natu otigu nuapougu lisimmo, kwa wai nuwa visugu.”
Seitani Yesu I Laulubu
(Metiu 4:1-11; Luk 4:1-13)
12 Mote lofana te Aluwa Yesu i wai doli nawe kalakalalelemo. 13 Ḡome i miyana suwala 40 nopodimo Seitani Yesu i wai laulubu. Bi ḡome gunuwala ḡamoḡamodi vaitedi bi aneya a yovo te a sagu.
Yesu taugomo 4 i yogedi te sakaiwata
(Metiu 4:12-22)
14 Alodi Diyoni delimo i sako nawe mulinemo Yesu i nawa Galilimo bi Maimaituwa giuna visuvisuna i gagaliye. Mak 6:14-29 15 Tana i giuna gado, “Maimaituwa ena waibada lava lisidimo saugina i tava. Emi gebogebo ko gosedi bi niga giuna visuvisuna koi sumaḡe.”
16 Yesu Galili topana dianaḡa i nawanawa bi Saimon ma tasina Endulu i kitedi. Tedi topamo a gomogomo banina tedi taugomogomo. 17 Yesu i giuwedina gado, “Ko nato ko kaiwatagu. Temi bainewa iyana ko konekonedina mainana taugu yai lovelovemi te lava ko konedi.” 18 Ḡome ma ḡemota edi gomo a gose kamaḡedi bi Yesu a kaiwata.
19 Yesu i taunawanawa mote lofana te Diyebedi natunatuna Diyemesi bi tasina Diyoni i kitedi. Tedi wagamo edi gomo a kaka visuvisudi. 20 Laḡannemo noke wagamo i kitekitedi te i yogedi, “Ko nato ko kaiwatagu!” Ḡome tamedi Diyebedi bi tausagudi wagamo a gosedi bi Yesu a kaiwata.
Yesu aluwa gebogebona oloto noponemo i kwavivai
(Luk 4:31-37)
21 Yesu bi ena tauwaikaiwatana a nato Kapeniam malagainemo, bi waiyawasi laḡaninemo i nawa bolu vanuwinemo bi wai lovelove i wai tubu. 22 Bi ḡome ena wai lovelove lava a vaivaiyena, ba a tagugu. Banina tana ena wai lovelove tabuna mote mai waiḡake tauwailovelovedi mainana. Tana ena wai lovelove vaiyena ba waibadana tana lisinemo.* Wala Maimaituwa Mousis waiḡake i vite te Islael lavedi maso a kaiwata.
23 Ḡome bolu vanuwinemo oloto aluwa gebogebona i sunesuneḡina i binauna gado, 24 “Tam Nasalet Yesuna kuna ḡoyena bai lisimaimo kwa voiye? Tam kuna natona kwa ka gebogebomai ee? Tagu e sibem tam aiyai? Tam waiyawa ḡemota Maimaituwa lisinaḡa kuna yovo.”
25 Yesu aluwa gebogebona i giuwena gado, “Kumiya moimoisili, bi oloto ku potiyovo kamaḡe!” 26 Aluwa gebogebona oloto i ka galagalali bi i voiye te i pekibubu bi i potiyovo kamaḡe.
27 Lava matabudi ḡome a sove, bi edi lava ai talayedina, “Niga bai kauwina ya tubutubuḡa? Niga wailovelove valivaliuna, tana ena wai bada aubaina te aluwa gebogebodi ya giuwedi bi kalinana sa kaikaiwata.” 28 Yesu giuna ma ḡemota Galili dobuna matabuna i nawa yaḡosi.
Yesu lava wapewapedi i wai yawasanidi
(Metiu 8:14-17; Luk 4:38-41)
29 Laḡannemo bolu vanuwina a gosegose, tedi Diyemesi bi Diyoni vaitena a nawana Saimon bi Endulu edi vanuwemo. 30 Bi mba vanuwinemo Saimon lawana gaugaululu i vai bi ena gabumo i kenakena. Tana i sida aubaina Yesu a tai nuwatau. 31 Kamaina bi Yesu i nawa waivini nimanemo i kabi bi i ka moito. Gaugaululu ma ḡemota i kovi bi waivini i moito te i wai kanidi.
32 Mba aubiganemo suwala bulubulumo Suwala bulubulumo banina ba waiyawasi laḡanna laḡanina i kovi. Diu edi waiyawasi laḡanina palaide suwala bulubulumo i wai tubu bi satade suwala bulubulumo i kovi. lava matabudi edi lava sidesidedi bi aluwa gebogebodi a sunesuneḡidina a avala tava Yesu lisinemo. 33 Tedi matabudi vanuwina didiyaunemo ai ḡemotidi. 34 Bi Yesu edi sida tabudi bi tabudi i wai yawasanidi. Bi kota aluwa gebogebodi vaitedi i wai potiyovodi. Bi aluwa gebogebodi a sibe te Yesu tana Maimaituwa ena Vinevine. Taunana aubaina mote i wai aninedi te maso a giu. Mote i wai aninedi te a giu banina Yesu i sibe te aluwa gebogebodi yai aninedi bi sa giuna, tana Vinevinena tauwaiyawasana ba lava saegeli te gaviya yai badae a noḡonoḡoti te tauwaiyawasana bena mainana. Diyoni 6:15
Yesu Galilimo i lauguguya
(Luk 4:42-44)
35 Olaolalemo dobu mawai dudubalina, Yesu vanuwa i gose bi i nawa dobu ḡuyuwinemo bi i laupali. 36 Saimon bi ena lava vaitedi a nawa a tavuḡe. 37 Tedi tana a banavi bi a giuwena gado, “Lava matabudi tam sa tavutavuḡem.”
38 Bi Yesu i giuwedina gado, “Tanawa malagai ḡesaunemo bi diyadiyanaḡa, bi tedi vaitedi lisidimo yea lauguguya. Taunana aubaina e tava.” 39 Kamaina bi tana Galili dobuna i nawa yaḡosi bi bolu vanuwidiḡa i laulauguguya. Bi kota lava nopodimo aluwa gebogebodi i kwavidi a potipoti yovo.
Yesu oloto sida kapa vaivaina i wai yawasani
(Metiu 8:1-4; Luk 5:12-16)
40 Oloto sida kapa i vaivaina i tava Yesu kaḡe pakanemo tuwapekana i wai tupagwaliḡe bi i giuna gado, “Bamoda kwa ḡoyena, te kwai yawasanigu.”§ Diu edi waiḡakemo lava sida kapa vaivaina ba yavana tabunemo miyamiyana. Diu ai ḡakedi te mote aiyai ima taukonidi. Lava gebogebodi ai ḡakedi te mote bolu vanuwinemo sima laudune e malagaimo sima miya. Bamoda aiyai gebogebona bi i yawasanana ba i visu munaḡa bi Maimaituwa matanemo tana kamaina. Lava vaitedi sa miya malagaimo bi ya laudune Maimaituwa ena vanuwemo.
41 Kamaina te Yesu oloto i kita te i launuwatoiye, te nimana i tuḡu bi i taukoni, bi i giuwena gado, “Yea ḡoyeḡoyena, kamaina kwa yawasana!” 42 Mote lofana te, sida kapa oloto i gose bi i yawasana. 43 Kamaina bi Yesu oloto i wai ḡake bi i giukamaḡe i nawa, 44 “Mote aiyai ḡesauna kuma giuwe. Kwa nawa pilisi sewasewa taugabuna lisinemo bi ya kitam. Bi Mousis sewasewa i giugiuwena mainana kwa voiye, te lava sa kitam te tam kuna yawasana.”** Pilisi ba puyo taugabuna lava aubaidi Maimaituwa matanemo. Tana oloto ya kamaḡati te ena sida kapa i kovi.
45 Geḡa te oloto i nawa bi lava i giu nawedi, bai lisinemo i tubutubuḡana giuna i ka didigi. Taunana aubaina tana mote amagaiḡa i miyamiya nawa. Bi tana i nawa dobu ḡuyuwidiḡa i miyamiya. Bi yaḡolo te lava bamo miemiedi tana lisinemo a tavatava.

1:2: Mal 3:1

1:3: Aisaiya 40:3

1:14: Mak 6:14-29

*1:22: Wala Maimaituwa Mousis waiḡake i vite te Islael lavedi maso a kaiwata.

1:32: Suwala bulubulumo banina ba waiyawasi laḡanna laḡanina i kovi. Diu edi waiyawasi laḡanina palaide suwala bulubulumo i wai tubu bi satade suwala bulubulumo i kovi.

1:34: Mote i wai aninedi te a giu banina Yesu i sibe te aluwa gebogebodi yai aninedi bi sa giuna, tana Vinevinena tauwaiyawasana ba lava saegeli te gaviya yai badae a noḡonoḡoti te tauwaiyawasana bena mainana. Diyoni 6:15

§1:40: Diu edi waiḡakemo lava sida kapa vaivaina ba yavana tabunemo miyamiyana. Diu ai ḡakedi te mote aiyai ima taukonidi. Lava gebogebodi ai ḡakedi te mote bolu vanuwinemo sima laudune e malagaimo sima miya. Bamoda aiyai gebogebona bi i yawasanana ba i visu munaḡa bi Maimaituwa matanemo tana kamaina. Lava vaitedi sa miya malagaimo bi ya laudune Maimaituwa ena vanuwemo.

**1:44: Pilisi ba puyo taugabuna lava aubaidi Maimaituwa matanemo. Tana oloto ya kamaḡati te ena sida kapa i kovi.