TETELA BOBO'ANA
MADIU
'I'ETOLADINA
Yesu 'ina tononoyao site tuwelo 'ebweuna 'ediyega 'ana esana Madiu, ta 'ana esana 'eluwena Libai. Tauna goma Yudiana, ta sa'i me Loma 'ilemedi ga takisi me Yudia 'ediyega 'iegogonedi me Loma manudi. Gete 'enega me Yudia Madiu sie'ipi'ipiyena ta Yesu Madiu 'i'atenuwa 'ole'oleyena, 'enega 'ibwauyena, ga 'imuliyena; ta muliyega Yesu tetelina 'i'etoladina ga 'isimanena 'aene tauna tuga Mesaiya nina. Mesaiya 'ana gibui 'ena Gilisi nate Keliso, ta 'ana mwalatoi To'etoseyana. Tauna Mesaiya nina me Yudia siyamwayamwa be to tuta 'imama be 'i'etoseyedi.
Yaubada 'ina loina 'ana mwalatoi wate buki gete solanaya.
1
Yesu Keliso tubunao
(Luke 3:23-38)
'Etoladi gete To'etoseyana Yesu gimi tubunao manudi. Yesu tubuna auwauna Debida, ta gimi tubuna Ebelaamo. Manuna gete nadigega: Ebelaamo nina natuna Aisake, ta Aisake natuna Yekobe, ta Yekobe natunao Yuda matasinao. Yuda nina natunao Pelesi be Dela ta sinadiya Temali, Pelesi natuna Esiloni, ta Esiloni natuna Elama, ta Elama natuna Aminadaba, ta Aminadaba natuna Nasoni, ta Nasoni natuna Salimoni, ta Salimoni mwanena Leabi ta natudi Boasa, ta Boasa mwanena Ludi, ta Boasa be Ludi natudiya Obedi, ta Obedi natuna Yese.
Yese natuna Debida, tauna kini, ta Debida nina Ulaya mwanena 'iagina ga 'iaina, ta natudiya Solomoni. Solomoni natuna Leobouma, ta Leobouma natuna Ebaya, ta Ebaya natuna Esa. Esa natuna Yosepata, ta Yosepata natuna Yolama, ta Yolama natuna Usaya. Usaya natuna Yotama, ta Yotama natuna Easi, ta Easi natuna Esekaya. 10 Esekaya natuna Manase, ta Manase natuna Amoni, ta Amoni natuna Yosaya. 11 Yosaya natunao Yekonaya matasinao, ta 'idi tutaya me Babiloni simai ga me Yudia sigiyaidi ga si'au'ewedi 'idi sena Babiloni 'enaya.
12 Tuta nina Babiloni 'ena simiyamiya, Yekonaya natuna Sialitieli, ta Sialitieli natuna Selubabela. 13 Selubabela natuna Ebiyuda, ta Ebiyuda natuna Ilayakimi, ta Ilayakimi natuna Esoli. 14 Esoli natuna Sadoka, ta Sadoka natuna Ekimi, ta Ekimi natuna Eliyuda. 15 Eliyuda natuna Eliyesa, ta Eliyesa natuna Madani, ta Madani natuna Yekobe.
16 Yekobe natuna Yosepa, tauna Meli mwanena, ta Meli natuna Yesu, ta Yesu nina sieesena To'etoseyana.
17 Yesu tubunao nidi 'adi esanao 'adi yau potitu. Manuna Ebelaamo 'abo 'enega tasasawa be Debida 'enaya nate 'adi yau potini. Ta 'enega 'eguma Debida 'enega tasasawa ga tuta nina me Babiloni me Yudia sitauyedi Babiloni 'enaya, nate 'adi yau potini. Ta 'idi tuta Babiloni 'enaya 'enega be Yesu 'ina tuta 'enaya 'adi yau wate potini.
To'etoseyana Yesu 'ina tubuwa
(Luke 2:1-7)
18 Gete nadigega To'etoseyana Yesu 'ina tubuwa. Yesu sinana Meli sisawa eyaiyena Yosepa 'enaya, ta ma'etamo nigeya simiyamiya luwa ta Meli 'i'euwana ta 'ina 'euwana nina Yaluyaluwa Tabuna 'enega. 19 'Enega Yosepa nina 'inuwamwau Meli 'ina 'euwana manuna. Ta Yosepa tai bobo'ana, 'enega geya nuwana be Meli 'igie omayamayae, ta nuwanuwa kwaiyega 'aene esi 'ida e'idi'idiye.
20 Ta Yosepa 'ina nuwanuwa ma'etamo 'ipaipaisewa, 'enega 'ina tuta 'enoya madawalega Yaubada 'ina anilose 'ebweu 'ieonena, 'igwae, “Yosepa, 'oyo Debida tubuna, geya'abo 'unuwanuwa mwau Meli 'ina 'euwana manuna, nate Yaluyaluwa Tabuna 'enega, 'enega tuwa tuga 'uda 'au'ewa mwaneyo. 21 Be ma'etamo natuna me'olotona 'ienatune, be 'ana esana 'ueese Yesu, manuna tauna 'ina tomotaiyao 'idi loegesiyao 'ediyega 'ida 'etoseyedi.”
22 Yage getedi ni'atu siapwesa manuna lowaenei palopita 'ebweu Yaubada 'ina ona 'igimisimanena ga Buki Tabu 'ena 'i'etoladina, 'igwae,
23 “Gomagweine nuwenuwebolana 'ida 'euwana be natuna me'olotona 'ienatune, ta 'ana esana sida eese Imanueli.”
(Ta esana nina 'ana gibui “Yaubada ma'edai.”)
24 'Enega Yosepa 'eno'enoega 'itoolo ga anilose nina 'ina ona 'iematamatanena, ga Meli 'iaina, 25 ta nigeya bwalana 'igitogitoo ga 'ana laba 'ienatuna ga Yosepa gwama nina 'ieesena Yesu.