Basef Ifimba Bu'wafi Matyu Nanda'afi
Basef bandafi Matyui
1:1-2:23 Bafasana Akusana Jisas nagatagasi
3:1-12 Jon aman anamba nagapisi'as embeli nawalipasa basefa Jisas
3:13-4:11 Jisas nofa' baptais ea' Satan nafi'i nagwambana ma nonda' waf awafi
4:12-18:35 Jisas nafe' itap lu'upa Galili nawalipasa basef bu'wafi natopalopa hiasi aowas naninani nanda'asi sataga bo'wes
19:1-20:34 Jisas nakwaha itap lu'upa Galili nafe' itap lu'upa Judai nawalipasa basef bu'wafi
21:1-27:66 Jisas nafe' Jerusalem nawalipasa basef owa' sanda'mana kot ea' sandolona naga' lawag usi'igai ti'wanaegai
28:1-20 Jisas nosafel wapani naso'asa maol alipisi ananisi ma ea' nalota heven ilif
Agofa mini'ap bafapana Jisasi
(Lu 3:23-28)
✡
1 Kro 17:11
✡
Jen 22:18
1 Wambota atamba bafapana akupana Jisas Kraisi amamba. Jisas nataga wambota Deviti, Devit nataga wambota atamba Abrahami.
2 Bafas ihas wambota atamba Abrahami isimba. Nogama Abrahami Aisak. Nogama Aisaki Jekop. Ea' Jekop ahama Judai naloma sahopana owapana ananimi.
✡
Jen 38:29-30
✡
Rut 4:18-22
3 Juda ahama Peres naloma Sira. Ma'mam amamu'wi Tamar. Ea' Peres ahama Hesroni, ea' Hesron ahama Rami.
4 Ram nogamana agilinama Aminadap. Ea' nogamana Aminadapi Nason. Ea' nogama Nasoni Salmon.
✡
Rut 4:13-17
5 Ea' Salmon nogamana agilinama Boas. Boas ma'mana Rehap. Boas nogamana agilinama Obet. Obet ma'mana Rut, ea' Obet nogamana agilinama Jesi.
✡
2 Sml 12:24
6 Ea' Jesi anen ahama dembinai king Deviti.
Devit naso' ano'w nemata'w fowa' Uria nagaso'akwi nola king Solomon.
7 Ea' Solomon nogamana agilinama Rehoboam, ea' Rehoboam nola Abiyah. Ea' nogamana Abiyah agilinama Aser.
8 Aser anen ahama Jehosafati, nola Joram. Ea' Joram ahama Usia.
9 Ea' Usia nola Jotam, Jotam nola Ehas ahama Hesekaiai.
10 Hesekaia nogamana agilinama Manase, ea' Manase nola Amos. Amos ahama Josaiai.
✡
2 Kin 24:14-15
✡
2 Kro 36:10
✡
Jer 27:20
11 Ea' Josaia nola Jekonia naloma owapana ananimi maloma ahamam ma'mam safe' sanda' kalabus sapani wambel Babilon lauguni.
✡
Esr 3:2
12 Esis sofa'as sawasi'as sisihis sapani Babilon, Jekonia nogamana ananinai agilinama Sealtiel, ea' Sealtiel nola Jerubal.
13 Jerubal anen ahama Abiuti ea' Abiut nola Eliakim. Nogamana ananinai agilinama Asor.
14 Asor nogamana agilinama Sadok, ea' Sadok ahama Akimi. Akim nola Eliut.
15 Ea' Eliut nogamana agilinama Eleasar, ea' Eleasar ahama Matanii. Ea' Matani nola Jekop ahama Josepi.
16 Josep anamba nagaso' Mariai. Ea' Maria dei' kola Jisas, dei' esis saga'i anen Krais Dembinai God nandandepana nasapa'ana nagafi'ii.
17 Amom bafapana akupana Jisasi fowa'imi siambam magataga na'amba. Amom amamba Abraham nolam magi' magatagai mafi'i matagama Devit, amamba siambam mataga 14-pelaim. Ea' amom amamba Devit nolam magi' magatagai mafi'i matagama nemaf afamba bousi sofa' esis Israel safe' sanda' kalabus sagape wambel Babiloni, amamba wapani 14-pelaim. Ea' amom amamba esis Israel sanda' kalabus Babilon solam magi' magatagai mafi'i a' matagama nogota Krais nagataga, amamba wapani 14-pelaim. Siambam sagakolasom a' mataga hiami 42-pelaim.
Maria kogola Jisas
(Lu 3:23-28)
✡
Lu 1:27,35
18 Fowa' Maria kogola Jisas Krais basef fagape na'amba. Ma'mana Maria esis sa'i ako'w koso' Josep, ea' esis bias ina dei' sandaso'ama, ata' owa'atin. Ea' sati Maria akofa' opafa Ambal bu'unai Godi nafi'mai ako'w ea' dei' a' opafu'w.
19 Waulunama'w akwo'unai Josep anen aman bu'unai. Anen nandaiwa'ma nonda'akw ambal aol. Na'amba okom ma'i nondambaho' nili'amona'w kope dowaf.
20 Anen nape ata' okom mandanda'ma isimba atis, ea' na'oh nandondo'ah owa', anona ensel Dembinaii natagama anen na'ipana na'i, “Josep, ina' akunama Deviti, ina ombal mehenama negao'wa waulu'mina ine'ikwi Maria, owa'i. Dei' main, awani inimba nagapau'wi, Ambal bu'unai Godi nafi'mai ako'w.
✡
Lu 1:31, 2:21
21 Ea' atiasi a' kola awani aman, awani inimba anen nogatopalopa amam nematawa hiasi ma nogakwaha waf awafi asasifi nofa'as sogotanimaii. Na'amba dei' ina' nihapomana agol ananigili Jisas. Basef kofagefa ma agol agalemba ifimba fa'i, anen aman nogofa' epes ananisii ma sogape andeande'i.
22 Hiahaom amamba hiami mataga na'amba si'i anif basef Dembinai nagaso'anaef malogol anona aman profet fowa'inai, dei' afataga endilisi. Fowa' gani profet anamba naga'ias na'amba na'i,
✡
Ais 7:14
23 ‘Owagama ano'w nemata'w sa'ukwi owa' ota' kogaso' amania a' opafu'w. Ea' kola anin awani aman agol ananigili Emanuel. Agol agalemba kofagogola ga'ias na'amba ga'i, God nape naloma apa'.
✡
Lu 2:7,21
24-25 Ea' Josep na'oh nandambema a' nanda'as si'i ensel naga'ipana. Ea' naila basef ifimba nao'wakw apa' esis ina sandaso'ama atogon atin, owa'. Ata' sape daindai safe' ma ako'w a' kogola awani aman. Ea' nahapomana agol Jisas.